Баланын тушоосун кесээрде ала жип атайын жүндөн эшип жасалат. Бул тууралуу Sputnik Кыргызстан маалымат агенттигине этнограф Айымкан Жаманкулова билдирди.
Анын айтымында, тушоо кесүүдө баланын бутуна каалаган жипти байлап коюу болбойт.
"Аны ак менен кара жүндөн эшип жасайт. Эгер бул кааданы жасоо убактысы кой кыркым мезгилине туш келбей калса, сөзсүз эле койдун жүнүн издөө зарыл эмес. Ала жипти куйрук жүн, шакмар, такым сыяктуу жүндөн деле жасаса болгон. Жашоодо ак менен кара, кубаныч менен кайгы, күн менен түн бирге жүрөт, ошонун баарына бала чыдап, сабырдуу болуп жашашы үчүн жип кара менен ак жүндөн даярдалат", — деди этнограф.
Жаманкулова колдон келсе ар бир ата-эне ырымдап баласынын тушоосун кесип, элден бата алып коюу керек экендигин кошумчалап кетти.
