Акыйкатчы институту: бюллетендер шайлоочулардан аз болууда

БИШКЕК, 15-окт. — Sputnik. Акыйкатчы аппаратынын кызматкерлери Кыргызстандын президентин шайлоо процессинде бир нече кемчиликтерди таап чыгышты.

Акыйкатчынын өкүлдөрү учурда шайлоо участкаларында байкоочу катары жети облуста жана Бишкек шаарында иштеп жатышат.

Учурда алардан аппаратуранын ишинде кемчиликтер болуп жатканын айтып жатышат. Мисалы, автоматтык түрдө саноочу аппаратуралар №7115, 2112, 5318, 1164 жана 5321-чи шайлоо участкаларында бюллетендерди кабыл алган эмес.

Ош облусунун Он-Адыр аймагындагы №5321 шайлоо участогу ачылгандан бери андагы урна иштебей, ордуна запаста турганын алып келишкен. Бирок ал дагы жардам бере алган эмес. Жыйынтыгында саат 9.20да ал жерге кадимки ичи көрүнүп турган урнаны коюшту.

Ал эми № 8177 участокто бюллетендер шайлоочуларга караганда аз экени белгилүү болду. Ошондой эле шайлоочуларды идентификациялоо боюнча аппараттардын иши үзгүлтүккө учуроодо.

№4068 жана 7069 участкаларында ден соолугу жагынан мүмкүнчүлүгү чектелген адамдар үчүн пандус жок экени аныкталган.

Мындан тышкары, акыйкатчынын өкүлдөрү БШКнын ишеним телефону аркылуу эч ким менен байланышуу мүмкүн болбогонун айтышты.

Өлкө аймагында президенттик шайлоо кандай өтүп жатканын Sputnik Кыргызстан агенттигинин тексттик трансляциясынан окуңуздар>>