БИШКЕК, 15-окт. — Sputnik. Президенттик шайлоого келгендердин ичинде 1994-жылкы паспорт көтөрүп жүргөндөр болууда. Акыркы сааттарга алынган маалыматтар боюнча мындай 14 учур катталганын Мамлекеттик каттоо кызматынын төрагасы Дастан Догоев билдирди.
Ал ошондой эле жарандар өзүлөрү катталбаган шайлоо участкаларына келип алган учурлар болуп жатканын айтты.
"Шайлоого барар алдында 119 номерине чалып, каттооңорду тактап алсаңыздар болот", — деди ал.
Ички иштер министринин орун басары Алмаз Орозалиев саат 13:00гө алынган маалымат боюнча шайлоонун жүрүшүндө олуттуу мыйзам бузуулар катталбаганын айтты. Болгону майда-барат мыйзам бузуулар болгон. Мисалы, Бишкек шаарындагы шайлоо участкаларынын биринде жаран добуш берүүнүн купуялуугун бузуп, бюллетенди телефонуна сүрөткө тартып алган.
Өзгөчө кырдаалдар министринин орун басары Калыс Ахматов бардык шайлоо участкаларында өрт коопсуздугу катуу сакталганын жана эч кандай адаттан тыш окуя катталбаганын кошумчалады.
Учурда өлкө боюнча 2 375 шайлоо участкалары ачылган, анын 234ү Бишкекте болсо, 37си чет жакта жайгашкан.
