Султанбекова: памирлик кыргыздарды канатыбызга калкалап алалы
Памирлик кыргыздарды калкалап алуу зарыл экендигин вице-премьер Чолпон Султанбекова Афганистандан келген кыргыздарды тосуп алуу учурунда журналисттердин суроолоруна жооп берип жатып билдирди.
Эске сала кетсек, өкмөттүн гуманитардык жардам алып барган тобу Памирден 33 кыргызды алып келди.
"Алгач жолдун кыйын экендигин айтып, ошого чыдашыңар керек дедик. Алар болсо "топоз минип 10 күндөп жүрө беребиз. Кыргызстанга барып ошол жерде каза болсок да кайылбыз" деп атып келишти. Буларды канатыбызга калкалап алышыбыз керек. Маселени саясатташтырбоону өтүнөм", — деди Султанбекова.
Афганистандан көчүрүлүп келген кыргыздар Нарындын Куланак айылына жайгаштырылмай болду.
