БАТКЕН, 14-окт.— Sputnik. Баткендин Кара-Булак айылынын тургуну Алихан Эгембердиев 1 гектар алма багынан 15 тоннадай түшүм жыйнайт. Алманын беш түрүн өстүргөн багбан жылына аны экспорттоп, 500 миң сомдой киреше табат. Анын кардарлары чет жакта болгондуктан, чек аранын ачылышы баанын жогорулашына кадимкидей түрткү бергенин айтат.
"Тажикстандан жеке ишкерлер жыл сайын жеринен 20-25 сомго чейин алып кетишет эле. Быйыл Өзбекстан менен чек ара ачылгандыктан кардарлар көбөйдү. Ошондуктан алма баасы жылдагыдан 25-27 сомго жогорулады", — деди багбан Эгембердиев.
Багбандын багынан алманын симиренко, превосход жана крипсон түрлөрүн көрүүгө болот. 15 тонна түшүм алса, анын 60 пайызын крипсон сорту түзөт. Анткени анын өтүмдүүлүгү жакшы жана сактоого ыңгайлуу.
Быйылкы түшүм жылдагыдан аз болгону менен чыгашасын актайт. Анткени аны зыянкечтерден жана ылаңдардан коргоого 50 миңдей акча сарптаган. Эми Тажикстандык кардарлар бир жума аралыгында алып кетишсе, багбан жер семирткичтерди салып, кийинки жылга камылгасын көрө баштайт.
