БИШКЕК, 14-окт. — Sputnik. Кыргызстанда ишемби күнү 22 миң 281 адам мөөнөтүнөн мурда шайлоо участокторунан тышкары добуш берет. Бул тууралуу БШКнын маалымат кызматы кабарлады.
- Шайлоо участокторунан тышкары, мөөнөтүнөн мурда добуш берүүгө укуктуулар:
- Шайлоо участокторуна ден-соолугуна же майыптыгына байланыштуу келе албагандар;
- Шайлоо күнү ооруканада, камакта жаткан шайлоочулар;
- Алыста жана жетүүгө кыйын болгон аймактарда (жайлоо) убактылуу жашагандар;
Мыйзам боюнча мөөнөтүнөн мурда добуш берүү иши шайлоого бир күн калганда жүргүзүлөт. Ошондой эле ага катышууга шайлоочу сөзсүз эртерээк арыз жазып коюусу зарыл.
Шайлоо учасктокторунан тышкары добуш берүү процессине президенттикке талапкерлердин, саясий партиялардын өкүлдөрү жана байкоочулар, журналисттер катышат.
Ал эми жыйынтыгы 15-октябрь күнү кечки саат 20.00дө маалым болот.
Кыргызстандын президентин шайлоого жалпы 3 миллион 25 миң 768 адам катталып, анын 2 миллион 908 миң 453ү өлкө ичинде добуш берсе, 98 миң 735 адам кошумча участоктордо, ал эми 18 миң 580и чет жакта жүргөндөр шайлай алат. Мамлекеттик каттоо кызматы мигранттардын көбү биометрикадан өткөнү менен жашаган жериндеги консулдуктарга каттоого турбагандыктан шайлоого катыша албай тургандыктарын айтты.
