БИШКЕК, 13-окт. — Sputnik. Кыргыз Эл артисти, залкар комузчу Нурак Абдрахмановдун 70 жылдыгына карата комузчулардын республикалык сынагы өткөрүлөт. Бул тууралуу Sputnik Кыргызстан маалымат агенттигине комузчу, сынактын уюштуруучусу Рахат Көчөрбаев билдирди.
Анын айтымында, кароо сынак Токтогул Сатылганов атындагы кыргыз улуттук филармониянын кичи залында 9-ноябрь күнү саат 9:00дө башталат.
"Бул иш-чарага Нурак Абдрахмановдун күүлөрүн жогорку деңгээлде черте билген 35 жашка чейинки комузчулар катыша алат. Алар залкар комузчунун "Соң-Көл", "Улуу тоолор", "Мезгил жаңырыгы", "Аттила хан", "Ата мурасы", "Азаттык камбаркан", "Өмүр көчү", "Алтын балалык", "Үркүн", "Шаттык" аттуу күүлөрүнүн ичинен үчөөнү тандап чертүүсү шарт", — деди Абдрахмановдун шакирти.
Көчөрбаев жеңүүчүлөрдү сыйлоо аземи 10-ноябрда өтө турганын кошумчалап кетти.
