БИШКЕК, 5-окт. — Sputnik. Омбудсмен аппараты 1 миллион 576 миң сомго (23 миң доллар) жол тандабас сатып алуу ниетинде. Тендер боюнча маалымат КРдин мамлекеттик сатып алуулар сайтында илинген.
Тендер кечээ, 4-октябрда, жарыяланган. Акыркы мөөнөтү — 25-октябрь. Мамлекеттик сатып алуунун шарты боюнча миллиондук унаа Акыйкатчы институту жайгашкан Тыныстанов көчөсүндөгү дарегине 2017-жылдын 1-декабрына чейин жеткирип берилиши керек.
Жолтандабастын кандай түрү керек экендигин мамлекеттик орган так жазган эмес. Болгону автоунаа "боз, кара же күмүш түстүү болушу кажет" экени айтылган. Ал эми анын техникалык абалы сатып алган тарап тандаган жердеги техникалык кароодон өткөрүлөт.
Акыйкатчынын институтунан бул унаа кайсы муктаждык үчүн алынып жаткандыгын айтышкан жок.
