БИШКЕК, 25-сен. — Sputnik. Саламаттык сактоо министри Талантбек Батыралиев Донор күнүнө карата кан тапшырганын аталган министрлик билдирди.
Массалык түрдө кан тапшыруу пункту Токтоболот Абдымомунов атындагы Кыргыз улуттук драма театрында уюштурулган.
Министр эртең мененки саат 8.45те келген. Анын айтымында, министр жыл сайын дал ушул күнү кан тапшырарын айтып, бардык жарандарды кошулууга чакырды.
"Ыктыярчылар менен донорлордун саны жылдан жылга азайып барат, бирок зарыл болгон учурда элдин баары эле токтоосуз түрдө мамлекеттен кан алууну талап кылат. Эгер жарандар өздөрү көмөктөшпөсө, мамлекет аны кайдан алмак эле?! Ошол эле убакта өлкө бийлиги кесипкөй донорлорго жардым берип турушу кажет, алар колдоого муктаж. Мисалы, мен бир жылда эки жолу кан тапшырам, эки күн эс алууга укугум бар. Дайыма кан тапшырган донорлор жакшы тамактанып, акчадан кем болбошу керек", — деди Батыралиев.
Министр мамлекет донорлорго бардык жагынан кам көрүшү керек деген пикирде.
