БИШКЕК, 18-сен. — Sputnik. Кыргызстандын президенти Нью-Йоркто өтчү Бириккен Улуттар Уюмунун (БУУ) 72-Башкы ассамблеясынын ишине катыша турганын өлкө башчынын маалымат кызматы билдирди.
2013-жылы Кыргызстандын демилгеси менен БУУнун Башкы ассамблеясы тарабынан атайын резолюция кабыл алынып, уран объектилерин рекультивациялоого даярдык көрүү боюнча ишти илгерилетүү, алардын айлана-чөйрөгө тийгизген таасирин иликтөө, каржылоо механизмдерин так аныктоого өбөлгө болгон.
"Быйылкы жыйында Атамбаев эл аралык коомчулукту Кыргызстандын аталган көйгөйдү чечүүдөгү ийгиликтери менен маалымдар кылат. Ошону менен бирге эл аралык өнөктөштөр менен кызматташуунун кийинки кадамдарын жана кабыл алынуучу жаңы резолюцияны талкуулайт. Андан сырткары, президенттин БУУнун Башкы катчысы Антониу Гуттереш менен жолугушуусу пландалган", — деп айтылат маалыматта.
Эскерте кетсек, Алмазбек Атамбаев Башкы ассамблеянын былтыркы жыйынына катышуу үчүн Нью-Йоркко бара жатып саламаттыгынын начарлашынан улам Түркиянын Стамбул шаарына конууга аргасыз болгон. Дарыгерлер өлкө башчынын жүрөк аритмиясына кабылганын аныктап, Атамбаев дарылануусун Москва шаарынан уланткан.
