БИШКЕК, 7-сен. — Sputnik. Август айынын аягына карата КЫргызстандын алтын жана валюта кору 2 миллиард 91,7 миллион долларды түзгөнү тууралуу маалымат Улуттук банктын сайтына чыкты.
30-июлга карата резерв 2 миллиард 61,7 миллион доллар болсо, июндун соңунда 31 миллионго аз болчу. Демек, акыркы айлар аралыгында валюта кору орточо эсеп менен күнүнө бир миллион долларга өсүүдө.
Улуттук банктын ачык маалыматына ылайык, бул 2014-жылдын сентябрь айынан берки эң жогорку көрсөткүч.
Кыргызстандын эл аралык валюта резерви ондон ашуун өлкөнүн валютасынан жана алтындан турат. Резерв эл аралык эсеп-кысап жана төлөмдөр, төлөм балансынын таңкыстыгын жоюу жана улуттук валютанын курсун турукташтыруу үчүн пайдаланылат.
