БИШКЕК, 4-сен. — Sputnik. Сентябрь айындагы аба ырайынын орточо температурасы 16-18 градусту түзөт. Бул тууралуу Sputnik Кыргызстан агенттигине Кыргызгидрометтин метеорологиялык бөлүмүнөн билдиришти.
Чүй облусунда сентябрь айынын биринчи декадасында ысык болот: түнкүсүн 11…16, күндүз 28…33 градус болушу күтүлөт. Андан кийин термометрдин көрсөткүчү төмөндөй баштайт: түнкүсүн 3…1, күндүз 17…28 градус жылуу болот.
Ош, Жалал-Абад жана Баткен облустарында орточо температура нормадан жогору болот. Айдын биринчи жарым бөлүгүндө түнкүсүн 13…18, күндүз 29…34 градус ысык болушу күтүлөт. Ал эми сентябрдын экинчи жарымында аба ырайы күндүз 24, түнкүсүн 12 градуска чейин төмөндөйт.
Ысык-Көл облусунда сентябрдын биринчи жарымында түнкүсүн 7…12, күндүз 21…26 градус болушу күтүлөт. Ал эми эки жумадан кийин термометрдин көрсөткүчү алты бирдикке төмөндөйт.
Нарын облусунда сентябрдын биринчи жумасы түнкүсүн 4…9, күндүз 24…29 градус жылуу болот. Кийинчерээк аба ырайы өзгөрүп, түнкүсүн 3 градус нөлдөн төмөн, ал эми орточо температура 16 градустун тегерегинде болот.
