БИШКЕК, 31-авг. — Sputnik. Жети өлкөнүн президенттери кыргызстандыктарды жана өлкө башчы Алмазбек Атамбаевди эгемендүүлүк майрамы менен куттуктады. Бул тууралуу мамлекет жетекчисинин расмий сайтында жарыяланган.
Билдирүүгө караганда, куттуктоо каттарын Россия, Азербайжан, Белоруссия, Германия, Грузия, Казакстан жана Кытай өлкөлөрүнүн ажолору жөнөткөн.
"Эки өлкө ортосунда ар түрдүү багыттагы кызматташтык өнүгүүдө. Ортодогу байланышты мындан ары да өнүктүрүүгө болгон күчүбүздү жумшайбыз деп ишенем", — деп жазылат Россия президенти Владимир Путин жөнөткөн куттуктоо катында.
Ал эми Нурсултан Назарбаев кыска убакыт ичинде Кыргызстан эл аралык коомчулукта кадыр-барктуу мүчө боло алганын баса белгилеген.
"Элибиз үчүн эки өлкөнүн ортосундагы достук мамиле мындан ары дагы бекемделип, өнүгөт деп терең ишенем", — деп жазылат Назарбаевдин катында.
Кытай лидери Си Цзиньпин өзүнүн куттуктоосунда Кыргызстан эгемендүүлүк алгандан берки 26 жыл ичинде чоң ийгиликтерге жетип, өлкөдө экономика өсүп, элдин жашоо турмушу жакшырып келе жатканын, ошондой эле Кыргызстандын таасири жогорулап жатканын баса белгилеген.
Быйыл Кыргызстан эгемендүүлүктүн 26 жылдыгын белгилеп жатат.
