ОШ, 30-авг. — Sputnik. Курман айт майрамынын урматына кыркка чукул коомдук транспорт калаа тургундарын жана меймандарын акысыз ташыйт. Бул тууралуу Ош шаардык мэриясынын басма сөз катчысы Талант Канатбек уулу Sputnik Кыргызстан агенттигине билдирди.
Анын айтымында, мындай иш-чара калаа башчысы Айтмамат Кадырбаевдин демилгеси менен уюштурулуп жатат.
"Бул жылы 1-сентябрь күнү кош майрамдын урматына эртең мененки саат 7:00дөн кечки 21:00гө чейин коомдук транспорт шаардыктарга акысыз кызмат көрсөтөт. №12-13-багыттагы 25 автобус жана №1-2-багыттагы 15 троллейбус бөлүндү. Аталган маршруттук схема боюнча жүрүүчү коомдук транспорт калаанын борбордук делинген көчөлөрү менен бир күн бою жарандарды акысыз тейлейт", — дейт Канатбек уулу.
Эске сала кетсек, мындай демилге Ош шаарында экинчи ирет уюштурулууда. Анткени ушул жылдын 25-июнда Орозо айт күнүнүн урматына алгачкы жолу коомдук транспортто жүрүү бекер болгон.
