БИШКЕК, 29-авг. — Sputnik. Түркиянын Анкара шаарында эсин жоготуп койгон аял тууралуу Кыргызстандын Тышкы иштер министрлиги маалымат таратты.
Эскерте кетсек, аталган аял тууралуу бир катар ЖМКлар жазып, социалдык тармактарда да чагылдырылган. Министрлик анын кыргызстандык жаран экенин, Жалал-Абадда туулуп-өсүп, 30 жашта экенин белгиледи.
"Кыргызстандын элчилигинин берген маалыматы боюнча аталган аял 27-август күнү Түркиянын укук коргоо органдары тарабынан кармалган. Элчиликтин кийлигишүүсү менен ошол эле күнү бошотулуп, Анкаранын мамелкеттик клиникаларынын бирине жөнөтүлгөн", — деп айтылат билдирүүдө.
Маалыматта элчилик учурда аялды Кыргызстанга кайтаруу боюнча тийиштүү аракеттерди көрүп жатканы кошумчаланды.
