БИШКЕК, 29-авг. — Sputnik. Жалал-Абад облусуна караштуу Ноокен айылынын Кайырма участкасында 18 үй-бүлө үстүбүздөгү жылдын февраль айынан бери жарыксыз отурат. Бул тууралуу аймактык кабарчыга жергиликтүү жашоочу Рахманжан Юлдашев билдирди.
Анын айтымында, тургундар кечкисин май чырак менен отурушат.
"Биздин айыл чек арада жайгашкан. Түнкүсүн шам чырак менен отурабыз. Уюлдук телефондорду коңшу айылдардан кубаттандырып жатабыз. Окуу жылы башталганча жарык берилип калса жакшы болот эле. Антпесе балдарыбыз кантип сабак даярдашат", — деди Юлдашев.
"Насостук станцияны 2015-жылга чейин Өзбекстан колдонгондуктан ноокендиктер светтин акчасын коңшу өлкөгө төлөп келишкен. Кийин станция Кыргызстанга өтүп, тургундарга убактылуу жарык берилип турган. Жашоочулардын турак жайларынын документи жок болгондуктан жарык берүү токтотулган", — деп "Жалал-Абад электр" ишканасынын жетекчисинин орун басары Азамат Пайазов билдирди.
Ал айыл өкмөт жерди мыйзамдаштырып берсе жарык берүүгө даяр экендиктерин кошумчалады.
