БИШКЕК, 29-авг. — Sputnik. Быйылтан тарта Кыргызстандын мектептеринде "Жаңы доорго кырк кадам" деген программанын негизинде билим берилип баштайт. Ал беш жыл ичинде толук ишке ашарын билим берүү жана илим министри Гүлмира Кудайбердиева билдирди.
Билим берүү министринин орун басары Салидин Калдыбаев "Жаңы доорго кырк кадам" программасынын алкагында билим берүү тармагын каржылоону жана билим берүүнүн маңызын жакшыртуу каралганын кошумчалады.
"Кесиптик билим берүү жагы да колго алынат. Эмгек рыногунда талап болгон кесип ээлерин даярдашыбыз керек. Андан сырткары, кийинки жылдан тарта сапаттуу китептерди чыгаруу каралган. Мектептерде быйылтан тарта англис тили сабактары көбөйтүлдү. Мурда эки саат болсо, азыр беш саат каралган. Ал үчүн чет тилчи 2455 мугалим "Сапат" билим берүү мекемесинин мектептеринен атайын окуудан өттү", — деди ал.
Калдыбаев ошондой эле 2018-2019-окуу жылында өлкөнүн бардык мектептерин интернетке кошуу палнадалганын, азыр 620 мектепте интернет бар экенин баса белгиледи.
