БИШКЕК, 22-авг. — Sputnik. Акыркы жарым жылда Түндүк Кореядан Сириянын илимий изилдөөлөр жана иштеп чыгуулар борборуна жиберилген эки жүк жолдон кармалып, токтотулган. Бул тууралуу БУУнун Түндүк Кореянын санкцияларды бузгандыгы боюнча докладга таянып Рейтер жазганын РИА Новости билдирди.
Агенттик БУУнун көз карандысыз эксперттери тарабынан даярдалган доклад аталган уюмдун Коопсуздук Кеңешине берилгендигин, ал эми сырдуу жүк кайдан токтотулуп калганын жазган эмес. Ал эмне жүк экендиги да ачык айтылган жок.
"Комиссия Түндүк Корея жана Сириянын ортосунда тыюу салынган химиялык заттар, баллистикалык ракеталар, курал боюнча кызматташууну иликтемекчи", — деп жазган агенттик.
Изилдөөлөрдү баяндаган доклад 37 беттен турган.
"БУУга мүчө эки мамлекет Сирияга деп жөнөтүлгөн жүктү ортодон токтотуп калышкан. Башка мүчө мамлекет комиссияга бул товарлар Түндүк Кореянын тоо-кен өнөр жайын өнүктүрүү боюнча соода корпорациясы менен Сириянын ортосундагы келишимдин бир бөлүгү деп эсептегенге негиз бар экендигин билдирген", — деп айтылат докладда.
Документте жүктү алгандар сириялык ишканалар экендиги белгиленген.
Химиялык куралдын запастары Сириядан чыгарылып кеткен. 2016-жылдын январь айында Химиялык куралга тыюу салуу боюнча уюм өлкөдө химиялык куралдардын арсеналы толугу менен жок кылынгандыгын кабарлаган.
