Жогорку сот "Текебаев тестке катышсын" деген чечим чыгарган эмес. Бул тууралуу БШК төрайымы Нуржан Шайлдабекова Sputnik Кыргызстан радиосуна маек куруп жатып билдирди.
Эске сала кетсек, буга чейин БШК соттолуп жаткан Өмүрбек Текебаевдин президенттикке аттануу үчүн кыргыз тили боюнча тестти тапшыруусуна уруксат берген эмес.
"Өмүрбек Текебаевдин өкүлүнүн арызы боюнча Жогорку соттун чечимин толугу менен аткардык. Сот Текебаевди кыргыз тили боюнча тестке катышуусун камсыз кылуу өтүнүчүнөн баш тартып, ушул жагдай боюнча БШКнын аракетсиздигин мыйзамсыз деп тапкан. Бул деген БШК аталган жагдай боюнча бир чечим кабыл алсын дегенди түшүндүрөт. Оң же терс. Ошондон кийин биз Текебаевдин өкүлүнүн өтүнүчүн канаатандырбай, бир чечим кабыл алдык", — деди Шайлдабекова.
Ал Жогорку сот Өмүрбек Текебаевди кыргыз тили боюнча тестке катышсын деген чечим чыгарбагандыгын, коомчулукта туура эмес маалымат кеткендигин кошумчалады.
