БИШКЕК, 12-авг. — Sputnik. Тажик президентинин сайтында каада-салтты, үрп-адаттарды жана ар кыл салтанаттарды иретке келтирүүнү көздөгөн мыйзамга киргизилчү өзгөртүүлөргө өлкө башчынын маалымат кызматы түшүндүрмө берди.
Бул тууралуу мыйзам долбоору президент Эмомали Рахмон тарабынан парламентке жиберилген. Ал бир катар мыйзамдарга толуктоо жана өзгөртүүлөрдү киргизүүнү камтыйт.
"Долбоордо калк кызыкчылыгын ашыкча чыгымдан коргоого багытталган бир катар жаңы нормалар киргизилди. Анын катарында Орозо жана Курман айттын дасторконуна ашыкча акча коротпоо зарылдыгын айтылып, ысырапкорчулуктун алдын алуу бар", — деп айтылат түшүндүрмөдө.
Эгер мыйзам кабыл алына турган болсо баланы отургузуу, ымыркайды бешикке салуу, кыркын чыгаруу сыяктуу тойлор үй-бүлө ичинде гана өткөрүлөт. Баланын жети күнүн өткөрүүгө тыюу салынат.
Мындан тышкары, сөйкө салуу, энесин чакыруу, атасын чакыруу, үлпүнчөгүн ачуу, куттуктоо, жолун тосуу сыяктуу адаттар өткөрүлбөйт.
Кафе, ашкана, ресторандардын администрациясы иш-чараны өткөрүп жаткан адам менен бирге эле чакырылган меймандардын саны жана убактысы боюнча жоопкер болот.
Муну менен бирге иш-чара өткөрүүнүн убактысы да белгиленген. Үлпөт жана башка тойлор дем алыш күндөрү саат 8.00дөн 22.00гө чейин, ал эми иш күндөрү 18.00дөн 22.00гө чейин өткөрүүгө уруксат берилет. Айыл жеринде 1-апрелден 31-октябрга чейинки аралыкта саат 6.00дөн 22.00гө чейин, 1-ноябрдан 31-мартка чейин саат 8.00дөн 22.00гө чейин, иш күндөрү саат 18.00дөн 22.00гө чейин өткөрүүгө болот. Тойдун үч саатка чейин гана созулушу шарт.
Аталган мыйзамды бузгандарга айып пулдун көлөмүн жогорулатуу каралган. Жаңы нормаларды сактабаган мамлекеттик кызматкерлер жумуштан алынат.
