БИШКЕК, 9-авг. — Sputnik. Ош базарын Бишкектин сыртына көчүрүү маселеси каралган жок деп билдирди Ленин районунун акими Нурдин Тынаев Sputnik Кыргызстандын кабарчысына.
Буга чейин жалпыга маалымдоо каражаттары аталган суроо талкууланып жаткандыгын жазган эле.
"Журналисттерге бул маселе маанилүү болуп тургандыктан эртеби-кечпи чечилип караларын айткан элем. Бул менин пикирим болучу. Ал эми бул маселе дал азыр, ушул учурда каралып жаткан жок", — деди Тынаев.
Ал Бишкекте бүгүнкү күндө базар эмес, гипермаркеттер менен азык-түлүк саткан дүкөндөр тармагынын болушу маанилүү экендигин айтты.
Аталган райондун аймагында жайгашкан "Дыйкан" базары мындан мурдараак жабылган. Ага Мамэкотехинспекциясынын бир канча мыйзам бузууларды тапкандыгы себеп болгон. Бийлик мунай базасынын жанында базардын жайгашуусу кооптуу экендигин да айткан. Сатуучуларды башка базарларга өткөрүү пландалганы менен алар каршы чыгып, ал тургай нааразылыкка да чыккан. "Дыйкан" май айында жабылган.
