БИШКЕК, 6-авг. — Sputnik. Кырсыктан улам эки бутунан ажыраган алматылык Екатерина Парафиева Instagram баракчасына машыгып жаткандагы сүрөттөрүн жарыялады. Кыздын башынан өткөргөн окуясын Sputnik Казакстан жазып чыкты.
Жарым жан кылган авария 16-июнь күнү болгон. Honda унаасынын айдоочусу менен анда жүргүнчү болуп бараткан Елена дөңгөлөктүн жарылганынан улам сыртка чыгып, жардам күтүп турушкан. Так ошол маалда каршы тилкеден чыга калган Toyota жүргүнчү ташып бараткан автобус менен кагыша кетип, жол жээгинде турган Honda унаасын көздөй кулайт. Натыйжада жардам күтүп турган эки кыз машиналардын ортосуна кыпчылып калат, Парафиева эки бутун кестирүүгө аргасыз болот…
Учурда жабырлануучу реабилитациядан өтүп, спорт менен машыгууда.
"Тоонун чокусуна чыккандагы сезимдерди эстедим. Ажайып кооздук ушунчалык жан дүйнөңө сиңип, эми мындай сулуулуксуз жашай алчудай эмессиң… Жылмайып, жакшы маанайда ойгондум. Бутума турууга милдеттүү экениме бүгүн дагы бир ирет ынандым", — деп ой толгоосу менен бөлүшөт Екатерина.
Соцтармактагылар Парафиевага моралдык колдоо көрсөтүп жатышат. Буга чейин Екатерина жакшы сөз айткан адамдарга ыраазычылык билдирип, жакында ооруканадан чыгарын жар салган.
