БИШКЕК, 4-авг. — Sputnik. Кант шаары тараптан жүргүнчү ташыган маршрутка трассадан чыгып кетип, капталынан түшүп калган. Бул тууралуу Sputnik Кыргызстан агенттигинин кабарчысына окуянын күбөсү билдирди.
Анын айтымына караганда, жол кырсыгы Алга айылындагы айланма жолдо катталган.
"Биз жолдо кетип баратып жолдун четине ыргып кеткен жеңил унаа менен маршрутканы көрүп калдык. Токтогон жокпуз, ошондуктан жабыр тарткандар бар-жогун билбейбиз", — деди күбө.
Чүй облустук Кайгуул милициясы аталган аймакта кырсык катталганын ырастады. Жол кырсыгы 18.00дөр чамасында катталган.
"Маршрутка жүргүнчүлөрү менен Кеминден Бишкекке айланма жол аркылуу келе жаткан. Экинчи маанидеги трассадан Toyota Rav-4 унаасы чыгып буска жол берген эмес. Унаалар кагышып жол четине ыргып кеткен. Натыйжада, маршруткадагы эки жүргүнчү жана Rav унаасынын айдоочусу менен кызы жабыркаган", — деп маалымат кызматынан билдиришти.
Жабыркагандар ооруканага жактырылган. Аталган факты боюнча тиешелүү экспертизалар дайындалып, тергөө иштери башталды.
