БИШКЕК, 3-авг. — Sputnik. Бүгүн "Ата-Бейит" улуттук тарыхый-мемориалдык комплексинде 1916-жылдагы Үркүн трагедиясында курман болгондордун арбагына багышталып куран окулгандыгын өкмөттүн маалымат кызматынан билдиришти.
Үркүн курмандыктарынын элесине арналган мемориалга гүл коюу иш-чарасына премьер-министр Сооронбай Жээнбеков, президенттик аппараттын жетекчиси Сапар Исаков, өкмөттүн Чүй облусундагы ыйгарым укуктуу өкүлү Бактыбек Кудайбергенов жана бир катар мамлекеттик, илимий, диний кызматкерлер катышты.
Эске салсак, 2016-жылдын 2-сентябрында Үркүндүн 100 жылдыгына карата "Ата-Бейит" улуттук тарыхый-мемориалдык комплексинде 1916-жылдагы трагедиялуу окуянын курмандыктарынын элесине арналып мемориал тургузулган.
Жогорку Кеңештин 2008-жылкы токтомуна ылайык, жыл сайын август айынын биринчи жумасы Үркүндө каза болгондорду эскерүү күнү деп белгиленген.
