Гепатиттин В жана С түрү адамда билинбей жүрүп өрчүй берип акыры церроз, боордун рагына алып келет. Бул тууралуу Sputnik Кыргызстан маалымат агенттигине Саламаттык сактоо министрлигинин Ооруларды алдын алуу жана мамлекеттик санэпидемкөзөмөлдөө департаментинин эпидемиологиялык башкармалыгынын башчысы Абдыкадыр Жороев билдирди.
Анын айтымында, гепатиттин А (жеңил) түрүнө көбүнчө жаш балдар кабылат.
"Гепатиттин А түрү адамга турмуштук шартта жугат. Башкача айтканда, оору дааратканадан кийин кол жуубагандан, кайнатылбаган сууну ичкенден, жашылча-жемишти жууп жебегенден, тазалыкты сактабагандан улам пайда болот. Мисалы былтыркы жылы гепатит А менен байланышкан 14615 учур катталган. Анын 80ден ашык пайызы жаш балдар. Ал эми гепатит С жана В түрү адамда билинбей жүрө берип акыры церроз, ракка айланып кетет", — деди Жороев.
Ал ошондой эле оорунун В жана С түрлөрү өнөкөткө айланып кетиши мүмкүн экендигин кошумчалады.
Гепатит дартынын келип чыгуу себеби жана дабасы тууралуу Sputnik Кыргызстан агенттиги даярдаган материалдан кеңири окусаңыз болот>>
