БИШКЕК, 29-июл. — Sputnik. Түндүк Кореянын борбордук телеграф агенттиги аталган өлкө континенттер аралык "Хвасон-14" деп аталган баллистикалык ракета учурганын билдирген. Бул тууралуу РИА Новости жазды.
Кезектеги сыноону өткөрүүгө өлкө лидери Ким Чен Ын буйрук берип, ракетанын асманга көтөрүлүшүн атайын жайдан карап турган.
Телеграф агенттиги учурулган объекти коңшу өлкөлөргө кооптуулук жараткан жок деп жазды.
Ишембиге караган түнү Түндүк Кореянын Япон деңизиндеги Хоккайдо аралдарын көздөй баллистикалык ракетасын Чагандо провинциясынан коё бергени тууралуу маалымат тараган. Пхеньян ракетаны алгач ирет түнү учургандыгы айтылууда.
Бул окуя дүйнө коомчулугунун нааразылыгын жаратты. Вашингтон бул сапар да Пхеньянын өзөктүү куралга укугу жоктугун айтса, кошуналары Токио менен Сеул бул кадамды "чагымчылдык" деп атады. Аны менен катар БУУга Түндүк Кореяга каршы санкцияны катуулатуу сунушу айтылды.
