"Зеленстрой" ишканасынын кызматкери Бишкектин чок ортосундагы жөө адамдар өтө турган чийинге тракторун таштап, түштөнүүгө кетип калган.
Кызматкер суу ташыган тракторду 12.30дар чамасында Чүй менен Эркиндик көчөлөрү кесилишкен жол чийинге таштаган.
Видеодо көрүнүп тургандай, жөө адамдар тракторду унаа жүргөн жол менен айланып өтүп жатышканын көрүүгө болот. Муну менен катар трактор айдоочуларга дагы жолтоо болгон. Sputnik Кыргызстан агенттигинин кабарчысы дагы тракторду айланып өтүп жатканда, аны унаа коюп кете жаздаган.
Бишкек шаардык Кайгуул милиция башкармалыгы жол эрежесин бузган жаранга карата чара көрүлөрүн билдирди.
Айдоочу саат 13.15де, 45 мүнөт өткөндөн кийин келген. Ага сугаруу иштеринен кийин эмнеге тракторун жолдон алып койбогону тууралуу суроо узатылганда так жооп кайтарбастан, кетип калган.
Бул окуя боюнча Бишкек мэриясы менен "Зеленстрой" ишканасына маалымат берилди.
