БИШКЕК, 20-июл. — Sputnik. КР президенти Алмазбек Атамбаев Татарстандын президенти Рустам Минниханов менен жолугушту. Бул тууралуу өлкө башчынын маалымат кызматы билдирди.
Атамбаев Татарстандын президентине эл аралык форумга катышып жатканына ыраазычылык билдирди.
Өз кезегинде Минниханов Атамбаевди Россияга жасаган мамлекеттик сапарынын алкагында Татарстанга дагы барганы үчүн ыраазычылык айтты.
Рустам Минниханов "Алтай цивилизациясы жана Алтай тектүү эл форуму" абдан маанилүү жана мазмундуу иш-чара экенине токтолду.
"Биз бардыгыбыз тилди, маданиятты, тарыхты сактоо туурасында ойлонобуз. Бул маселелер учурда абдан маанилүү жана актуалдуу, өзгөчө көңүл бурууга татыктуу", — деди ал.
Жолугушууда Кыргызстан менен Татарстандын ортосундагы кызматташууну мындан ары өнүктүрүү маселелери талкууланды.
