БИШКЕК, 13-июл. — Sputnik. Борбор калаанын түштүк тарабында жарылуунун үнү угулгандыгын жергиликтүү жашоочулардын бири социалдык тармакка жазган.
"Түнкү саат 3.30дар чамасында 12-кичи райондо жарылуу угулуп, анын артынан эле тарсылдаган катуу үндөр чыкты. Эртең менен жанагыдай үн дагы кайталанды. Эмне болгонун билген киши барбы?" — деп жазган ал.
Бишкек шаардык милициясынан Sputnik Кыргызстанга аталган маалыматты тактап жатышканын айтышты.
Ал эми ӨКМгө өрт тууралуу кабар түнкү саат 3.36да келип түшкөн.
"Mercedes S-500 үлүсүндөгү унаанын ички жана мотору жайгашкан бөлүктөрү күйүп кеткен. Окуя болгон жерге өрт өчүрүүчүлөр барып, аны 4.13тө толугу менен өчүрүшкөн", — деп айтылат маалыматта.
Аталган кырсыктан эч ким жабыркаган эмес.
