БИШКЕК, 9-июль — Sputnik. Жакында Кыргызстанга легендарлуу КВН командаcы, 2006-жылы Жогорку Лигасынын чемпиону болгон РУДН курама командасы келет. Бул тууралуу "Ала-Тоо" аймактык КВН лигасынын президенти Александр Ященко билдирди.
Өлкөгө команданын капитаны Сангажи Тарбаев баш болуп, бардык оюнчулардын келиши күтүлүүдө. Алар "Ала-Тоо" аймактык КВН лигасынын Жайкы кубогуна конок катары чакырылган.
Оюн 22-июль күнү кечки саат 19:00дө башталып, Чолпон-Ата шаарынын Бактуу-Долоноту айылындагы ат майданда уюштурулат.
Лигага катыша турган командалардын тизмеси азырынча толук тактала элек. Анткени оюнчу катары жергиликтүү КВН командалардан тышкары Казакстан жана Башкыртстандан да арыздар келип түшүүдө.
Оюнду "Азия MIX" командасынын капитаны Эльдияр Кененсаров алып барат.
Белгилей кетсек, "Ала-Тоо" аймактык лигасы КВНдин эл аралык биримдигинин түзүмүнө кирет.
