БИШКЕК, 5-июл. — Sputnik. Бүтүрүүчүлөргө "алтын сертификат" тапшыруу аземинде президент Алмазбек Атамбаев өзүнүн балалыгы тууралуу айтып берди.
Өлкө башчысы башынан өткөн нерселер тууралуу баяндап, туугандары жана жакын достору сатып кеткен учурларды эскерди.
"Эч качан мүңкүрөп калбагыла, тагдырга баш ийбегиле. Ар дайым ачык жана чынчыл болгула. Адам каталарды сараңдыгынан эмес, жокчулуктун айынан кетирет", — деди Атамбаев.
Анын айтымында, "тагдырга каршы" — бул анын жаш кездеги урааны болгон. "Судьбе назло" аттуу чыгармасы дагы 18-19 жашында ушундан улам жазылган.
"Мен намаз окуган, бирок айрым нерселерди түшүнбөгөн депутат, жетекчилерди көрдүм. Мухаммед пайгамбар илим менен бир саат алектенүү түнү бою кудайга жалынганга барабар деп айткан", — деди президент.
Атамбаев сөзүнүн аягында кыргыздар байыркы элдердин бири экенин айтып, өз маданиятыбызды, каада-салтыбызды жана кийим-кечебизди сактап калуу жаш муундун милдети экенин кошумчалады.
