Дастан Догоев Лондондун Кавендиш колледжинде, Кингстонск университетинде билим алып, Финансы министрлигинде иштеген. Андан кийин Мамлекеттик каттоо кызматынын жетекчисинин орун басары болуп эмгектенген.
32 жаштагы Жийдеш Идирисова эки жыл мурда Эл аралык Тurkvision сынагынын жеңүүчүсү аталып, учурдагы популярдуу ырчылардын сап башында. Ырчы буга чейин тар чөйрөдө гана ырдап келген.
37 жаштагы Уран Ахметов 2016-жылдын ноябрь айында Юстиция министри болуп дайындалган. Ал Кыргызстан Эл аралык университетинде жана Японияда билим алып, юриспруденция тармагында эмгектенип келген. Учурда ал өкмөттөгү эң жаш министр.
32 жаштагы Кайрат Примбердиев эки жыл мурда чыгармачылыгы өрт алып Россиянын сахнасында ийгиликтерди багындырып, акырындан КМШга таанылып келе жатат. Кайрат деген ысым кыргыз шоу бизнесинде 2005-жылы пайда болгон.
37 жаштагы Индира Жолдубаева 2015-жылдын 29-январында Баш прокурор болуп дайындалган. Кыргыз мамлекеттик университетин аяктап, юридика тармагында эмгектенип келген.
Белгилүү опера ырчысы Марат Ибраев карьерасын отуз жашында баштап, 38 жашында вокалдык чеберчиликти үйрөнүп, кийин Италиядан билимин тереңдеткен. Учурда 48 жашта.
45 жаштагы белгилүү стилист-дизайнер, визажист Замира Молдошева карьерасын 2005-жылдан тарта ийгиликтүү улантып келет. Ал мезгилде кыргыз шоу-бизнесинин орто мууну калыптанып, Молдошева бир топ чыгармачыл адамдарга стилист-дизайнер катары жардам көрсөткөн.
31 жаштагы Нурбек Айбашов учурда популярдуу болгон "Апамды издеп" тасмасынын продюсери. Жаш продюсер буга чейин"Салам, Нью-Йорк!" тасмасын тарткан.
Жогорку Кеңештин 44 жаштагы депутаты Аида Салянова 2010-жылы Юстиция министри, бир жылдан кийин Баш прокурор болуп дайындалган. Салянова жогорку окуу жайларында окутуучу катары эмгектенип, бара-бара мамлекеттик жумуштарга олуттуу кирише баштаган.
41 жаштагы Наргиза Осмонова келиндер арасында өткөрүлүп келе жаткан эл аралык сынактардын жеңүүчүсү. Үч жыл мурун Америкадагы "Дүйнө ханышасы" сынагына катышып, биринчи орунду ээлесе, Кытайдагы "Аалам айымы — 2016" сынагынан "Ишкер айым" наамына татыган. Индияда өткөн "Missis Top of the World – 2016" сынагынан бешинчи орунду багындырган. Наргиза айым сынактарга катышып, чыгармачылыкка аралашып ырдаганга чейин жеке ишкерлик менен алектенген.
31 жаштагы Азамат Жаналиев бир жыл мурда мык менен жиптен сүрөт тартуу өнөрүн колго алып, ата мекендик белгилүү адамдардан тарта дүйнөлүк лидерлерге чейин портреттерин түшүргөн. Жаналиев "Улуу Кыргыз изи" долбоорунун негиздөөчүсү.
