БИШКЕК, 26-июн. — Sputnik. Ат-Башы районунун Ак-Муз айылындагы Боогачы мектебинин 10 жылдык бүтүрүүчүлөрү өздөрү аяктаган мектепке белек катары бийиктиги 12 метрлик желек орнотуп беришти. Бул тууралуу Sputnik Кыргызстан агенттигине уюштуруучулардын бири Азамат Турсукеев билдирди.
"Биздин айылда 10, 20 жылдык кечелерде айылдыктар үчүн керектүү иш бүтүрүп берүү салтка айланган. Биз болсо айылыбызга туу орнотуп берүүнү эп көрдүк", — деди Турсукеев.
Анын айтымында, желек саюу жөн жерден келип чыккан идея эмес. Муну менен алар өздөрүнүн артында өсүп келе жаткан муунду патриоттуулукка чакырууну көздөгөн.
