Элден чогултулган битир-садака атайын түзүлгөн комиссиянын көзөмөлү менен колунда жок же ден соолугу начар жарандарга тапшырылат. Бул тууралуу Sputnik Кыргызстанга муфтияттын маалымат катчысы Максат Атабаев билдирди.
Анын айтымында, өлкө аймагында битир-садаканы чогултуу, бөлүштүрүү иштерин атайын комиссия көзөмөлдөйт.
"Орозо айында бардык казы, имам-хатиб жана имамдар калктын аялуу катмарынан арыз кабыл алышты. Мына ошонун негизинде кайрылгандарга жардам берилет. Ошондой эле ооруканаларга, карылар үйүнө жана тез даарыланууга муктаж болгондорго колдоо көрсөтүлөт", — деди Атабаев.
Андан сырткары, ал Өзгөндө көчкүдөн жана Чоң-Алайда жер титирөөдөн жабыркагандарга материалдык колдоо көрсөтүү пландалып жаткандыгын кошумчалады.
Эскерте кетсек, муфтият буга чейин битир-садаканын бирдиктүү баасын бекиткен.
