БИШКЕК, 24-июн. — Sputnik. Премьер-министр Сооронбай Жээнбеков Россиянын Санитардык башкы дарыгери Анна Попова менен жолугуп, санитардык-эпидемиологиялык жааттагы кызматташууну талкуулады. Бул туурасында өкмөттүн маалымат кызматы билдирди.
Анда санитардык-эпидемиологиялык жааттагы кызматташуу боюнча сүйлөшүүлөр жүргөн. Жээнбеков Россиянын колдонуучулардын жана адамдын жайлуулугун көзөмөлдөгөн федералдык кызматтын (Роспотребнадзор) Кыргызстан менен кызматташуусу маанилүү экендигин баса белгиледи.
"ЕАЭБдин алкагында биздин өкмөт колдонуучулардын таламын талашууга өзгөчө көңүл коюп, ушул жаатта кызматташууга өзгөчө көңүл бурат", — деди өкмөт башчы.
Жолугушууда Попова кызматташууга ыраазычылык билдирип, Кыргызстанга болгон сапарынын алкагында эки өлкө ортосунда кара тумоо илдетинин алдын алуу боюнча долбоорду ишке ашыруу жүрүп жатканын айткан.
