БИШКЕК, 24-июн. — Sputnik. Орозо айт намазы учурунда Бишкектин борбордук көчөлөрү жабылаарын борбор калаанын милициясынан кабарлашты.
Эске сала кетсек, быйыл орозо айт 25-июнга белгиленген.
"Айт намазы учурунда милициянын эки миң кызматкери коопсуздукту сактап, жарандар тыкыр текшерүүдөн өткөрүлөт", — деп жазылат маалыматта.
Намаз учурунда Фрунзе көчөсү Панфилов көчөсүнөн Эркиндик бульварына чейин; Абдымомунов көчөсү Панфиловдон Тыныстанов көчөсүнө чейин; Орозбеков жана Раззаков көчөлөрү Чүй проспектисинен Фрунзе көчөсүнө чейин жабылат.
Шаардык милиция жарандарды тартипти сактап, жабылбаган жолдор менен жүрүүгө чакырат.
