БИШКЕК, 24-июн. — Sputnik. Президент Алмазбек Атамбаев Кыргызстандыктарды орозо айт менен куттуктады. Бул тууралуу мамлекет башчынын маалымат кызматы билдирди.
Куттуктоодо миңдеген мекендештерибиз жылдын эң узак жана аптаптуу мезгилинде, бир ай бою Кудайдын чоң сыноосунан өткөндүгү айтылат.
"Орозо – күнүмдүк көр тирликтин кулу болуп калган жокмунбу, өмүрүм маңыздуу өтүп жатабы, эл-жериме жакшылыгым, пайдам тийип жатабы деген суроолорго жооп издөө мезгили", — деп жазылат маалыматта.
Өлкө башчысы көп улуттуу кыргыз эли өз тарыхында көп сан маданияттар менен диний ишенимдерди, дүйнө таанымдарды баштан өткөргөндүгүн айтат.
"Кыргыз эли өзүнүн эркин мүнөзүн, терең тарыхы менен маданиятын муундан-муунга сактап жана мусулманчылыктын жакшы жөрөлгөлөрү менен шайкеш келтире алган", — деп айтылат.
Мамлекет башчысы куттуктоосун элге кут, бакыт-таалай каалоо менен аяктайт.
