Тынчтык инновациялары боюнча Булан институту Кыргызстандагы авариялык абалдагы мектептер, аларды оңдоо, жаңыларынын курулуш темпи, финансылык булактар жана ашар жолу менен салынган билим берүү мекемелери жөнүндө иликтөө жүргүзүп, доклад жазды. Бул туурасында аталган институттун Борбор Азия программасынын жетекчиси, конфликтолог жана журналист Чолпон Орозобекова Sputnik Кыргызстан агенттигине билдирди.
"Иликтөөдө мектеп курулушуна кетип жаткан каражаттар жана анын булактары тууралуу анализ кылдык. Изилдөө эки айга созулду. Эмнеге бул темага кайрылдык? Анткени Кыргызстанда көпчүлүк мектептер эскилиги жетти. Ал эми Булан институту мектеп курулушунун сапатын көзөмөлгө алууну, тендерлерди ачык жарыялоону жана сапатсыз курулган мектептер боюнча тергөө иштерин тыкыр жүргүзүүнү сунуштадык", — деди Орозобекова.
Анын айтымында, ушул тапта Кыргызстанда 2222 мектеп бар, анын ичинен авариялык абалда тургандардын саны — 193. Алардын арасында мындан 127 жыл илгери курулган мектеп дагы бар.
