БИШКЕК, 18-июн. — Sputnik. Борбордук шайлоо комиссиясына президенттикке талапкерлердин биринчиси болуп Назарбек Нышанов арыз бергенин Sputnik Кыргызстанга БШКнын маалымат кызматы билдирди.
Ага ылайык, ал керектүү документтерин чогултуп келип 16-июнь күнү тапшырган. БШКнын юристтери бардык маселелер боюнча ага кеңеш берет.
Нышанов 2012-жылы убактылуу өкмөттүн ишин сынга алып оппозиция кыймылын түзгөнү менен белгилүү болгон. Ошондой эле соңку эки жылдан бери коррупция менен күрөшүү үчүн аткаминерлерге люстрация мыйзамын киргизүүнү сунуштап келет.
Айрым маалыматтарда ал 2007-жылы көп суммадагы акча уурдоо боюнча деп шектелип издөөгө алынганы айтылат.
Кыргызстанда президенттик шайлоо 15-октябрда өткөрүлөт. Буга чейин бир катар партиялар өз талапкерлерин көрсөткөнү менен азырынча эч ким расмий түрдө каттала элек.
