БИШКЕК, 10-июн. — Sputnik. "Ислам мамлекети" уюмунун террорчулары (Россияда жана Кыргызстанда тыюу салынган террористтик уюм) өздөрүнүн тыюу салынган идеологиясын чыныгы брендге айландырууга жан үрөп жаткандыгын Dagens Nyheter басылмасына шилтеме берип Sputnik Тажикстан агенттиги жазды.
"Мышык, Nutella жана кроссовкалар… Мунун баары террорчулардын Батыштын жаштарын өзүнө тартуу программасында колдонулуучу катажаттар. Бул жөнүндө Швед тоталдык коргонуу институтунун докладында айтылды. Анда жазылгандай, ИМдин жаш тарапкерлери өздөрүн Jihadi Cool деп аталган субкультуранын бир бөлүгү катары көрсөтүп жатат", — деп айтылат билдирүүдө.
Мындай жаштар кара өңдөгү кенен шым менен свитер жана кроссовкаларды кийип жүрүшөт.
Иликтөөлөргө караганда, белгилүү соода маркалары жаштарды өз катарына тартууну каалаган террордук топтун негизги куралы болуп калууда. Мисалы, алар кадимки Nutella шоколад майын, Skittles конфеттерин пайдаланып, халифатта деле мунун баары бар экенин көргөзгүсү келип жатат.
Ошондой эле алардын баракчаларынан ит-мышыктардын элжиреткен сүрөттөрүн көрүүгө болот.
Мындан тышкары, террорчулар жаштардын көңүлүн буруу үчүн өздөрүнүн катарына учурда "модалуу" кесиптердин ээлерин тартууга аракеттенип жатканы айтылды.
