БИШКЕК, 9-июн. — Sputnik. Бишкек шаарында 11-июндан 15-июнга чейин кыргыз эл жазуучусу Жалил Садыковдун 85 жылдыгынын урматына уюштурулган республикалык Театр фестивалы өтөт. Бул тууралуу Маданият, маалымат жана туризм министрлиги билдирди.
Фестивалдын максаты театрдын жаңы багытын аныктап, чыгармачыл эргүү тартуулап, режиссерлордун ишин көрсөтүп берүү болуп саналат. Маданий иш-чара Ала-Тоо аянтынан театрлаштырылган жөө жүрүш менен башталат.
IV республикалык Театр фестивалы Маданият, маалымат жана туризм министрлиги тарабынан уюштурулууда.
Иш-чаранын алкагында 11-июндан 15-июнга чейин Жаштардын "Туңгуч" театрында, Токтоболот Абдумомунов атындагы кыргыз улуттук драма театрында, Бакен Кыдыкеева атындагы жаш көрүүчүлөр театрында, Чыңгыз Айтматов атындагы орус драма театрында бир катар спектаклдар коюлат.
Эл жазуучусу, драматург Жалил Садыков 1932-жылы туулган. Ал Кыргызстандын гимнинин авторлорунун бири болуп саналат.
