БИШКЕК, 8-июн. — Sputnik. Түркмөнстанда калкка социалдык жеңилдик берүү системасы жокко чыгарылат. Бул туурасында мамлекет башчысы Гурбангулы Бердымухамедов өкмөттүн жыйынында сүйлөп жатып билдиргенин Түркмөнстандын мамлекеттик маалымат агенттиги жазып чыкты.
Билдирмеге ылайык, Бердымухамедов вице-премьер Бяшиммырат Ходжамаммедовго баардык жеңилдиктерди жокко чыгаруу боюнча сунуш даярдоого тапшырма берген.
"Мезгил талабына ылайык, мындай система толугу менен жакшы натыйжа бербей калганы көрүнүп турат. Ошондуктан Ходжамаммедов, сизге жакынкы күндөрү социалдык жеңилдиктерди алып салуу боюнча сунуш даярдоого тапшырма берем. Ал эми чынында эле социалдык жардамга муктаждарга берилген жеңилдиктер өзгөртүүсүз калуусу керек", — деп айткан мамлекет башчы.
Буга чейин Түркмөнстан жарандары суу, газ жана электр энергиясын акысыз колдонуп келген. Мындай жеңилдиктер 1993-жылы Сапармурат Ниязов жаңыдан президент болуп шайлангандан кийин киргизилген болчу.
