БИШКЕК, 8-июн. — Sputnik. Бишкектеги "Арзу" ресторанынан Кызыл китепке кирген жаныбарлардын катырлган кеби табылган. Бул тууралуу Sputnik Кыргызстан агенттигине Германиянын айлана-чөйрөнү коргоо союзунун (NABU) коомчулук менен байланышуу боюнча адиси Зарина Эсенбаева билдирди.
Айта кетсек, борбор калаадагы көңүл ачуу жайларында браконьерлерди кармоо максатында рейд жүргүзүлүп жатат. Жыйынтыгында аталган ресторандан аркарлардын кеби табылды.
Аркар (Марко Поло) Кызыл китепке кирген жаныбар болгондуктан ага аң улоого тыюу салынган.
"Булардын сакталып турганына 20 жылдан ашык убакыт өттү. Буларга атайын документ даярдоо керектиги тууралуу билген эмесмин. Бирок билбестик мени жоопкерчиликтен бошотпойт. Уруксат берүүчү документ алуу мүмкүнчүлүгү болсо, албетте, жакшы. Эгер андай болбосо мен буларды музейге белек кылууга даярмын", — деди директор.
Айлана-чөйрөнү коргоо жана токой чарбасы мамлекеттик агенттигинин өкүлү Абай Жаныбековдун айтымында, ресторанга эскертүү берилди.
"Ресторанга Кызыл китепке кирген жаныбарлардын кебин сактоо үчүн документтерди даярдоого эки жума убакыт берилди. Эгер ошол аралыкта кагаздар даяр болбосо, экспонаттар алынат", — деди ал.
Рейдди NABU, милиция жана Айлана-чөйрөнү коргоо жана токой чарбасы мамлекеттик агенттиги биргелешип өткөрүүдө.
