БИШКЕК, 8-июн. — Sputnik. Ош облусунда бир жуманын ичинде 7 жаш бала сууга агып каза болгон. Бул тууралуу Ош ОИИБдин маалымат катчысы Жеңиш Ашырбаев аймактык кабарчыга билдирди.
Анын айтымында, аталган дубанда милиция кызматкерлери "Алдын алуу" деп аталган рейд өткөрүп, сууга түшүп эс алган балдарга эскертүү беришти.
Кечээ, 7-июнда Араван районунун Кызыр-Абад айылында үч жаштагы бөбөк талаада эгин сугарып жүргөн атасынын артынан барам деп арыктагы сууга агып кетип чарчап калган.
Атасы Эмилбек Маматбаев кызынын артынан ээрчип кеткенин билген эмес.
"Талаага жүгөрү сугарганы чыгып кайра үйгө келсем кызым жок. Мен аны үйдө калган окшойт деп ойлогом. Кайра талаага чуркап барсам кызымды арыктын жээгине чыгарып коюшуптур. Маңдайы менен бир жерге катуу тийген окшойт, көгөрүп калыптыр. Унаа чакырып ооруканага алып бардык эле, сактап кала алышпады. Кызым суудан аябай коркчу, кантип арыкка түшүп кетти, билбейм", — деди Маматбаев.
Жайында күн ысык болгондуктан көбүнчө балдар сүүга чөмүлөм деп агып кетишет. Мындан улам Араван РИИБдин кызматкерлери балдар жана ата-энелер арасында түшүндүрүү иштерин жүргүзүп, балдарды жалгыз калтырбоого чакырды.
