БИШКЕК, 3-июн. — Sputnik. АКШда бейшемби күнү таңга маал Чикагодон Майамиге бет алган United Airlines самолету жерден көтөрүлөрү менен кыймылдаткычы күйүп кеткен. Бул тууралуу The New York Daily News басылмасы жазып чыкты.
Учак О'Хара аэропортунан жаңыдан көтөрүлгөндө кыймылдаткычына куш кирип кетип өрт чыккан. Учкучтар бир кыймылдаткычын өчүрүп, жерге эптеп конушкан.
Окуяга күбө болгон жүргүнчүлөрдүн бири күйүп жаткан кыймылдаткычты видеого тартып Twitter баракчасына жүктөгөн.
What to do when your plane engine blows and bursts fire? Thank the pilot for landing and have a beer @UnitedAirlines @fly2ohare #birdattack pic.twitter.com/Poi4XmPZ3a
— Tim (@tim_ea_arnold) 1 июня 2017 г.
"Учуп бараткан самолетуңдун кыймылдаткычы күйүп кетсе эмне кылыш керек? Аман-эсен жерге кондурган учкучка ыраазычылык айтып, сыра ичиш керек", — деп жазган колдонуучу.
Жүргүнчүлөрдүн дагы бири Fox 13 телеканалына "Учактын ичи түтүнгө толуп, такылдаган үндөр тынбай угулуп жатты. Баарынан да түтүндүн жыты бизди катуу коркутту" деп айтып берген.
United Airlines түзүлгөн ыңгайсыздык үчүн жүргүнчүлөргө кенемте төлөп берүүнү убадалады.
