Баатыр деген ким эле? Алмустактан бери эле ата-бабаларыбыз эл-жерин коргоп, эл керегине жараган кишилерди башкача баалап, айрымдарын баатыр деп келишкен. Бирок ошол баатырлар да өз ичинен бөлүнөрүн билчү белеңиз? Мисалы, көк жал менен шердин, жеке баатыр менен ээрчиме баатыр дегендер ким? Ошондой эле баатыр деген атка татыктууларды кандай сапаттар коштоп жүрүшү керектигин да билип алганыңыз ашыкча кылбайт.
Азыр менден "сен төрт жашыңда эмне кылчу элең" деп сурашса "топурак жеп, аны башыма куюп ойночумун" деп жооп узатмакмын. Азыркыларчы? Азыркылар башкача, тили булдурап чыга элегинде машиналардын маркаларын атап, түрдүү мамлекеттердин борборлорун билишет. Ушундай укмуштуу бала — Алан Жороевдин такалбай машинанын маркаларын айтып жаткан видеосун көрүңүздөр.
Алардын ичинен чоңойгондору 18 жашында интернетти чукулап отуруп эле айына оңбогондой акча табышат. Мындан алты-жети жыл мурда интернетте отуруп эле акча тапса болот десе эч ким ишенчү эмес. Азырчы? Азыр элдин баары интернетте отуруп алып иштейт, жыргайт.
Мыкты окуучу менен мугалимге мектепти мындан 20 жыл мурда бүтүп кеткен классташтар Дубайго жолдомо алып беришти. Айылдын күнүмдүк турмушунан колу бошобогон мугалим менен окуучунун кубанычы көккө жетип жатканын элестетсеңиз. Мугалим — мөмөлүү дарак деп байыртадан бери эле айтып келишкен эмеспи.
Жапаров менен Чудинов да "кылтакка" илинди. Башкы прокуратура "Бир Бол" фракциясынын депутаттары Акылбек Жапаров менен Игорь Чудиновго карата кылмыш иш козгоду. Алар премьер-министр менен финансы министри болуп турганда ссуда катары бөлүнгөн 200 миллион сомду максатсыз пайдаланган деп айыпталып жатат. Буга чейин да аткаминерлерге козголгон кылмыш иштери ара жолдо калып, кумга сиңген суудай жок болду эле. Эми мунусунан жыйынтык чыкса экен.
Валюта наркы. Сомдун баасы долларга карата орто эсеп менен 67.91 (сатып алуу) жана 68.17 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.50 сом, Аи-95 үлгүсүндөгү бензин 40.90 сом, ал эми дизель майы 36.00 сомдон сатылууда.
Соңку сөз ордуна. Жаздын акыркы күнүн жакшы маанай менен узатып, жайды кубануу менен тосуп алалы. Расул Үсөналиев.
