Равшан Жээнбеков пансионатындагы коттеджди белгисиз бирөөлөр өрттөп кеткенин айтты

Жазылуу
Экс-депутат имаратты карасанатай кишилер өрттөгөнүн маалымдады.

БИШКЕК, 28-май — Sputnik. Равшан Жээнбековдун аялы Салкын Алимбаевага таандык Ысык-Көлдөгү "Асыл-Таш" пансионатындагы коттедж күйүп кеткенин Жээнбеков өзү тастыктады.

Кырсык 28-майга караган түнү болгон. Мурдагы депутат пансионаттын аймагында электр энергиясы болбогонун белгиледи. Ал чыңалуу болуп өрт чыкты деген версия чындыкка коошпой турганын айтып, коттеджи өрттөп эле кетишкенин кошумчалады.

"Милицияга арыз менен кайрылабыз. Ким өрттөп кетиши мүмкүндүгүн мен билем. Алар жыл сайын бизди коркутуп, акча өндүргүсү келет", — деди Жээнбеков.

Анын айтымында, келтирилген чыгым 50 миң долларга чамалайт.

ӨКМ өрт чыкканын тастыктап, анын себеби такталып жатканын маалымдады. Өрт тууралуу билдирүү саат 03:17де келип түшүп, окуя болгон жерге эки машина чыгып кеткен. Өрт 300 чарчы метр жерге жайылган. Эки кабаттуу үйдө алты бөлмөнүн ичиндеги төшөк, килем, 12 стол, 12 стул күйгөн. Андан сырткары, 20 күндөн калкалоочу чатыр менен 15 керебет өрттөнгөн.

Жаңылыктар түрмөгү
0