БИШКЕК, 28-май — Sputnik. Маалымат жана массалык коммуникация боюнча эксперттик топ Өзбекстанга алып кирүүгө жана жайылтууга тыюу салынган компьютердик оюндардын тизмесин жарыялады. Бул тууралуу Sputnik Өзбекстан маалымат агенттиги билдирди.
"Кара тизмеге" 34 оюн кирди. Алардын катарында белгилүү болгон Grand Theft Auto: San Andreas, Mass effect, Dead space, Call of Duty: Black ops, Silent Hill, Resident evil 4 жана башка оюндар бар.
Эксперттик комиссия аталган компьютердик оюндар зомбулукту, порнографияны жайылтып, өлкөдөгү коомдук-саясий абалды бузат деген корутунду чыгарган.
"Кара тизмеге" кирген оюндардын эң "улуусу" 1995-жылы чыккан Phantasmagoria оюну, эң "жашы" 2016-жылы чыккан Doom 4, Dead by Daylight жана Hitman оюндары. Ошондой эле өзүнүн сюжети жагынан коомчулукка зыян алып келбей турган The Sims 3 менен The Sims 4 оюндары дагы тизмеге кирип калган.
Өзбекстандын оюнчулары "кара тизмеге" Dota, Counter-Strike же Quake оюндарын да киргизип койбосо экен деп тынчсызданып жатканын басылма баса белгилейт.
