БИШКЕК, 28-май — Sputnik. Президент Алмазбек Атамбаев Кыргызстандагы жалпы чек арачыларды кесиптик майрамы менен куттуктады. Бул тууралуу өлкө башчынын маалымат кызматынан кабарлашты.
Президент куттуктоосунда чек арачылардын кесиби ары татаал жана жоопкерчиликтүү экенин баса белгилеген.
"Чептен эрдин күчү бек" демекчи, чек арачы болуу мекенге чексиз берилгендикти жана чыныгы кесипкөйлүктү, кыраакылыкты жана эрдикти талап кылган ардактуу жана абройлуу кызмат. Терроризм, контрабанда, чек араны мыйзамсыз кесип өтүү менен күрөшүү – бул бүгүн чек арачылар аткарып жаткан иштердин бир чети эле", — деп президенттин куттуктоосунда айтылат.
Мамлекет башчы кесип ээлерине ден соолук, зор бакыт жана ийгиликтерди каалап өткөн. Ал ошондой эле өз сөзүндө чек араны коргоонун жаңы ыкмаларын киргизүү зарылдыгын белгилеген.
