БИШКЕК, 26-май — Sputnik. Бишкекте 24-май күнү ТЭЦтин аймагында төрт айлык ымыркай коляскадан кулап калган. Окуя видеого тартылып калып, социалдык тармакта кызуу талкуу жаралды. Sputnik Кыргызстан агенттигинин кабарчысы жарандар менен байланышып, окуянын чоо-жайын аныктап көрдү.
Шаршемби күнү жаш келин Чүй проспектисин бойлой коляскадагы кызы менен кетип бараткан. Жабырлануучунун айтымында, жолдо тыгын жаралып айдоочулар тротуар аркылуу өтө баштаган.
Келин окуяны телефонунун камерасына тартып алган.
"Унаалар тротуар аркылуу баратышты. Honda Fit үлгүсүндөгү унаанын айдоочусу менин жаныма келгенде эмнеге мындай кылып жатканын айттым. Ал болсо газды баскан бойдон кетти, ошондо унаанын алдыңкы дөңгөлөгү коляскага тийип, кызым жерге кулап түштү. Дагы жакшы чөпкө кулады", — деди ымыркайдын энеси.
Учурда ымыркай ооруканада. Оор жаракат алган эмес.
"Тыгынга байланыштуу тротуарга чыгууга туура келди. Коляска сүйрөгөн келин видеого тартып жаткан. Мен аны өткөрүп жиберүү үчүн акырын айдадым. Бирок ал унааны тээп кирди эле жөнөп кеттим. Бирок коляскага тийген эмесмин", — деди Аида.
Айдоочу аял кийинки күнү эртең менен Бишкек шаарынын Кайгуул милициясына келген. Унаасы айып короого токтотулган. Окуянын чоо-жайын аныктоо үчүн тергөө башталды.
Учурда милиция калган унааларды издеп жатат.
